SKÁLD.IS

Sigurlín er fædd árið 1952. Hún er þekkt sem hagyrðingur og skáld og á ófá innleggin í Vísnahorn Morgunblaðsins í gegnum árin.

Sigurlín er stúdent frá Menntaskólanum við Hamrahlíð og lauk BA-prófi í íslensku frá Háskóla Íslands 1990. Hún er ritstjóri þingræðna á upplýsinga- og útgáfusviði Alþingis. Kveðskapur hennar hefur birst víða. 

Sigurlín teiknaði myndir í fyrstu kennslubók í táknmáli sem út kom á Íslandi árið 1981. Þá skrifaði hún nokkrar barnabækur ásamt Margréti Sesselju Magnúsdóttur sem komu út árið 1994.

Sigurlín hefur sent frá sér ljóðabækurnar Á mína vísu og Að gefnu tilefni 2012, Pönnukökur og plokkfiskur (2015) og Nágrannar (2019)  og hefur auk þess gefið út nokkrar bækur með ljóðum og litlum sögum ásamt fleiri meðlimum úr Ljóðahópi Gjábakka. Sigurlín er einnig virkur félagi og í stjórn Kvæðamannafélagsins Iðunnar.

Sigurlín yrkir undir hefðbundnum bragarháttum, svo sem rímnaháttum og ljóðahætti, og hefur meira að segja ort dróttkvætt. Viðfangsefni hennar eru til dæmis dýr og gróður, vinir og samferðafólk.

Í nýrri bókum Sigurlínar eru einnig örsögur sem eru knappir textar fullir af visku og húmor. 2022 gaf hún síðan út örsagnasafnið Gestagangur.