SKÁLD.IS

Móheiður Hlíf Geirlaugsdóttir er fædd 17. mars 1976 í Aix-en-Provence í Suður-Frakklandi þar sem hún ólst upp til 11 ára aldurs.

Sextán ára flutti hún í Norðurmýrina og hóf nám við Menntaskólann í Reykjavík og lauk þaðan stúdentsprófi 1996. Að loknu stúdentsprófi hélt hún til Parísar og lagði stund á klassísk fræði í Sorbonne í einn vetur en dvaldi stutt við í Frakklandi þetta sinnið. Hún fór heim og hóf nám í heimspeki.

Móheiður lauk BA gráðu í heimspeki frá Háskóla Íslands árið 2002 og fjallaði lokaritgerð hennar um siðfræði Simone de Beauvoir. Árið 2011 útskrifast hún með MA-próf frá Háskóla Íslands í þýðingafræði og meistaraprófsverkefnið var þýðing á siðfræðiritinu Pyrrhos og Kíneas eftir Simone de Beauvoir. Þýðing Móheiðar var gefin út í Lærdómsritaröð Hins íslenska bókmenntafélags árið 2018.

Móheiður hefur fengist við ýmiskonar störf og búið víða erlendis, nefna má að um tíma bjó hún í Berlín og í þrjú ár í Edinborg.

Móheiður hefur starfað lengi sem leiðsögumaður, einnig við sýningarvörslu í Einarssafni, Þjóðminjasafninu og Safnahúsinu og starfar nú sem bókavörður á Bókasafni Seltjarnarness meðfram ritstörfum, sem felast bæði í frumsköpun og þýðingum. Móheiður hefur gefið út ljóðabækur og einnig skrifað ljóð, greinar, viðtöl og bókmenntarýni í blöð og á bloggsíður.

Í ágúst 2020 stofnaði Móheiður bókabúðina, Kanínuholuna – fornbókaveröld í bílskúrnum sínum í Stangarholti. Nafnið á búðinni vísar til Lísu í Undralandi og er holan opin flesta sunnudaga. Mikill hluti bókakostsins er bókasafn föður Móheiðar, Geirlaugs Magnússonar skálds og þýðanda með meiru. Í kanínuholunni var haldin Bókmenntahátíð alþýðunnar á Menningarnótt 2022 og „off-venue“ viðburður af Bókmenntahátíð í Reykjavík 2023.

2024 gaf Kanínuholan út Dagatal skáldkvenna, þar sem finna má afmælisdaga íslenskra og erlendra skáldkvenna, tilvitnanir og myndir.

Móheiður býr með eiginmanni sínum í Stangarholti og eiga þau tvær dætur og kött.