SKÁLD.IS

Konur skrifa um konur sem skrifa

Hlín Agnarsdóttir

Hlín Agnarsdóttir leikskáld og rithöfundur  er fædd  í Reykjavík 1953.

Hlín er fjölmenntuð í leiklistar- og bókmenntafræðum, hefur post-graduate gráðu í leikstjórn frá Drama Studio í Lundúnum, fil.kand-próf í leiklistarfræðum frá Stokkhólmsháskóla og MA-próf í almennri bókmenntafræði frá Háskóla Íslands.

Hlín  hefur gefið út skáldsögur og sjálfsævisöguleg verk. Fyrir bókina Að láta lífið rætast var hún tilnefnd til Íslensku bókmenntaverðlaunanna í flokki fræðirita og bóka almenns eðlis, árið 2003.

Hlín hefur skrifað fjölda leikrita fyrir leiksvið, útvarp og sjónvarp, m.a. toilettedramað Konur skelfa sem sýnt var við metaðsókn í Borgarleikhúsinu, og komið að öðrum handritaskrifum fyrir sjónvarp og aðra miðla. Hún hefur leikstýrt í öllum helstu leikhúsum landsins, m.a. hjá Leikfélagi Akureyrar, Leikfélagi Reykjavíkur og í Þjóðleikhúsinu. Hlín þýddi og leikstýrði Hræðileg hamingja eftir Lars Norén hjá Alþýðuleikhúsinu og síðar þýddi hún Laufin í Toscana fyrir Þjóðleikhúsið eftir sama höfund.

Hlín skrifaði Láttu ekki deigan síga, Guðmundur (ásamt Eddu Björgvinsdóttur) sem sýnt var í Stúdentaleikhúsinu við miklar vinsældir. Önnur verk sem hún hefur skrifað og jafnframt leikstýrt eru: Karlar óskast í kór, Alheimsferðir Erna og Gallerí Njála. Sokkabandið sýndi verk hennar Faðir vor í Iðnó 2004.

Á undanförnum árum hefur Hlín kennt ritlist og leiklist við Kvikmyndaskóla Íslands og Háskóla Íslands. Hún hefur ennfremur starfað sem leikstjóri og dramatúrg og verið leiklistargagnrýnandi á DV og í Kastljósi á RÚV. 


Ritaskrá

  • 2023  Einlífi - ástarrannsókn
  • 2022  Yfirsjónir (smásögur)
  • 2021  Meydómur: sannsaga
  • 2020  Hilduleikur
  • 2013  Oníuppúr
  • 2012  Perfect
  • 2012  Gestaboð Hallgerðar
  • 2011  Flóttamenn
  • 2010  Hallveig ehf
  • 2009  Blómin frá Maó
  • 2007  Fundarherbergið/Lífið liggur við
  • 2004  Faðir vor
  • 2003  Að láta lífið rætast: ástarsaga aðstandanda
  • 2001  Hátt uppi við Norðurbrún
  • 1998  Svannasöngur
  • 1997  Gallerí Njála
  • 1997  Aðeins einn
  • 1996  Konur skelfa
  • 1993  Alheimsferðir Erna
  • 1993  Líflínan
  • 1989  Karlar óskast í kór
  • 1984  Láttu ekki deigan síga, Guðmundur

Tilnefningar

  • 2003  Til Íslensku bókmenntaverðlaunanna fyrir Að láta lífið rætast

Heimasíða

 www.hlinagnars.is

Tengt efni