SKÁLD.IS

Konur skrifa um konur sem skrifa

Guðlaug María Bjarnadóttir

Guðlaug María er fædd 1955 og ólst upp á Akureyri. 

Hún lauk leiklistarnámi 1977 og síðan uppeldis- og kennslufræði ásamt menntunarfræði á tíunda áratugnum og hefur starfað sem kennari. Hún sendi frá sér ljóðabókina Snert hörpu mína 1989. Um hana skrifaði Jenna Jensdóttir m.a. í Morgunblaðið: „Guðlaug María er ungt skáld, sem lofar góðu. Hún á ýmislegt ólært, en nær samt lengra í skáldskap sínum en almennt gerist með fyrstu bók.“ 

Árið 1992 sendi Guðlaug María frá sér barnabókina Ævintýri á ísnum. Hún gerist á Akureyri. Um bókina segir í Degi 18. desember sama ár: „Prúður drengur úr Reykjavík fer í heimsókn til skyldmenna sinna fyrir norðan og er tekinn til bæna af tápmiklum systrum. Börnin lenda í ýmsum uppákomum og á stundum ganga systurnar kannski næstum of langt þegar þær eru að prófa frænda sinn að sunnan.“ Snorri Sveinn Friðriksson myndskreytti. Bókin fékk góða dóma hjá Súsönnu Svavarsdóttur í Morgunblaðinu.

Guðlaug María er búsett í Reykjavík. Eiginmaður hennar er Ólafur Haukur Símonarson, rithöfundur.

 

Sársauki

Auk sársaukans

auk sársins

auk angistarinnar

auk einmanaleikans

blæðir úr sárinu mínu

endar allt líf með dauða.

Það er sárt.

Hringinn á enda.

Að kveldi

segir sonur minn systur sinni frá englunum

og syngur hana i svefn.

Að morgni hefst bardagi

hnúar og hnefar

tungan brýnd.

Sem betur fer eru dagarnir

teknir að styttast.

 

Mynd af Guðlaugu Maríu: Kvikmyndavefurinn


Ritaskrá

  • 1992 Ævintýri á ísnum
  • 1989 Snert hörpu mína